Venderdis, ils 22 da december 2017 han ils scolars dalla secunda superiura dallas vischnauncas da Falera, Sagogn, Schluein, Laax e lur scolasta Patricia Cadruvi envidau ils cussadents digl ARGO da Glion per far communablamein Nadal. Ina fiasta che negin vegn ad emblidar aschi spert…

Avon igl eveniment han ils scolars ornau las meisas e cuschinau – la finfinala duei vegnir surviu in menu sco s’auda: aperitif, suppa da giutta, barsau cun gratinau da truffels vitier rieblas e sco dessert differents tiramisus e quei per biebein 80 persunas.

Duront las lecziuns da religiun ha la catecheta Karin Last priu atras il tema: „carstgauns cun impediments“ culs scolars. La malsegirezia dall’entschatta ei stada svanida cura ch’ils clients digl ARGO ein arrivai. Ils scolars ch’eran repartgi sin tuttas meisas han beinspert anflau il contact ed ei ha regiu ina atmosfera zun cordiala ed emperneivla.

Denter las tratgas han ils scolars procurau per attracziuns: els han cantau, saltau, sunau cun instruments da brass, zambergiau culs cussadents digl ARGO ina steila pil pigniel ed organisau in giug da tuchegiar. Era il pensum dalla moderaziun ha in scolar supriu.

Il punct culminont ei staus alla fin: tuts ein serandunai entuorn il pigniel da Nadal ed han cantau la canzun da „Clara notg“ cun grond anim. Perfin in regalin han tuts anflau sut il pigniel. Il pli prezius schenghetg ei denton immaterials – numnadamein tut las bialas impressiuns che tuts han astgau rimnar en quella cuminonza extrordinaria.